பதினைந்து ஏக்கர் கோவில் நிலத்திற்கு , வருட குத்தகையாக 1000 ரூபாயை வாடகையாக தருகின்ற , அவலம்

பல நண்பர்கள் வேண்டுகோளின் படி, நான் இரண்டு நாட்களுக்கு முன் சென்று வந்த திருவண்ணாமலை, விழுப்புரம் கோவில்களின் தகவல்களை பட்டியல் இட்டு (இரண்டு புகைப்படம்) உள்ளேன். கோவிலின் தொடர்பு எண்களையும் பெற்று வந்தேன். என்னால் முடிந்த அளவு தகவல்களை தொகுத்து உள்ளேன். ஏதாவது தவறு இருந்தால் மன்னிக்கவும். உதவி செய்ய விருப்பம் உள்ள நண்பர்கள் , நீங்களே கோவில் அர்ச்சகரை தொடர்பு கொண்டு, உங்களால் முடிந்த நிதியுதிவி செய்யலாம்.

கோவிலின் கால பூஜைகள் மற்றும் கோவிலை கட்டுபடுத்தும் அதிகாரம் பற்றிய தகவல்கள், சரியாக சொல்ல முடியவில்லை. சில இடங்களில் அர்ச்சகர் நான்கு கால பூஜை என்றால், உள்ளூர் மக்கள் 2 கால பூஜை என்கிறார்கள். சில இடங்களில் அரசாங்க மேற்பார்வை என்கிறார்கள், இன்னோர் சாரார் அரசாங்கத்தின் ஆளுமையில் உள்ள கோவில் உள்ளது என்று தகவல் சொல்கிறார்கள்.

ஆனால் வரலாற்றில் உச்சத்தில் இருந்த பல கோவில்கள், இன்று காலத்தின் எச்சமாய் நிற்கிறது. பதினைந்து ஏக்கர் நிலத்திற்கு , வருட குத்தகையாக 1000 ரூபாயை வாடகையாக தருகின்ற , அவலம் இன்னமும் தொடர்கிறது. 1000 ரூபாய் வைத்து கொண்டு ஒரு கோவில் என்ன செய்ய முடியும், 500 ரூபாய் மாத சம்பளம் பெற்று கொண்டு ஒரு அர்ச்சகர் எப்படி குடும்பம் நடத்துவார்.

இயற்கை சீற்றத்திற்கு தாங்கி நின்ற கோவில்களை, எப்படியாவது அழித்து விட வேண்டும் என்று மனிதன் நினைத்து விட்டான் போலும்.

கோவில்களில் குடி கொண்டு இருக்கும் இறைவனை விட்டு விடுங்கள்.
கோவில்கள் அழிந்து போனால், நம் வராலறு அழிந்து போகும். எல்லா கோவில்களும், தமிழக மன்னர்களை பற்றிய ஏதாவது செய்திகளை தாங்கி நிற்கிறது.

கோவில் ஒன்று இல்லாமல் போய் இருந்தால், நான் அரசாண்ட தமிழ் இனத்தை சேர்ந்தவன் என்று யாராலும் இன்று பெருமை பேசி திரிந்து கொண்டு இருக்க முடியாது. கோவில் ஒன்று இல்லாமல் போனால், எங்கே போய் பரதம் ஆடுவீர்கள், கல்யாணம் செய்வீர்கள், உங்கள் குறை சொல்லி அழுவீர்கள்.

தமிழ்நாட்டில் ஏழு கோடி தமிழ் மக்கள், அதில் 6 கோடி பேர் ஹிந்துக்கள். அதில் பத்து லட்சம் பேர் மாதம் பத்து ரூபாய் போட்டால் கூட , தமிழகத்தின் எல்லா கோவில்களையும், நம்மால் காப்பாற்ற முடியும்.

முப்பது பேர் சேர்ந்து ஒரு கோவிலை தத்து எடுக்கலாம். ஒரு கால பூஜை என்பதை இரு காலம் ஆக்கலாம், மாதத்திற்கு ஒருமுறையாவது கோவிலை சுத்தபடுத்தும் பணிக்கான பண செலவை செய்யலாம்.

நான் என் நண்பர்களை சேர்த்து செய்யலாம் என்று முடிவு செய்து உள்ளேன்.

கோவில்களை காப்பது என்பது, நமது கடந்த கால பெருமை மிக்க வரலாற்றை அடுத்த தலைமுறைக்கு மீட்டு எடுத்து செல்லும் முயற்சியின், மீள் தொடர்ச்சி என்பதை நம் மக்கள் புரிந்து கொள்ள வேண்டும்.

இந்த தொடர்ச்சி நின்று போனால், அது வீழ்ச்சி ஆகி விடும்!!

கோவில்கள் செல்லும் வழி

http://goo.gl/dwUMMx

சுந்தரர் அவதரித்த ஊரின் கோவில்,விளையாட்டு மைதானமா?

சுந்தரர் அவதரித்த ஊரின், ஈசனின் கோவில், விளையாட்டு மைதானமாக பயன்படும் அவலம். 274 சிவாலயங்களின் பயணத்தின் ஒரு பகுதியாக, இரண்டு நாட்களுக்கு முன், விழுப்புரம் மாவட்டம் , திருநாவலூர் பக்தஜனேஸ்வரர் கோவில் சென்றேன், அங்கே தான் இந்த காட்சி.

விளையாட்டு தவறு அல்ல. விளையாடும் இடம் தவறு. மனம் நிம்மதி தேடும் இடத்தில , கூச்சல் போட்டுக் கொண்டு விளையாடிக் கொண்டு இருக்கின்றனர். கோவில் வெளியில் செருப்புக்களை பக்தர்கள் விட்டு , உள்ளே நுழைந்தால், இவர்கள் செருப்பு காலுடன் உள்ளே நுழைந்து விளையாடி கொண்டு இருக்கின்றனர்.

அவர்களை தட்டி கேக்க கோவில் நிர்வாகம் அஞ்சுகிறது. அங்குள்ளவர்களை விசாரித்தால், அந்த பயத்தில் நியாயம் உள்ளதாகவே தெரிகிறது. மிக தவறான வார்த்தைகள் வரும் என்று அஞ்சுகிறார்கள். நான் கேக்க முற்பட்ட போது, தடுத்து விட்டார்கள். நீங்கள் வெளியூர், நீங்கள் பேசி எந்த பயனும் இல்லை. நீங்கள் வார்த்தைகள் வாங்க வேண்டி வரும் என்றார்கள்.எந்த அளவு உண்மை என்று தெரியவில்லை.

ஆனால், இவர்கள் உள்ளே நிரந்தரமாக நெட் கட்டி விளையாடு கின்றனர் என்பது நிதர்சமான உண்மை. அது பக்தர்களுக்கு மிக பெரிய இடைஞ்சல் என்பதும், கோவில் சுற்றும் பெண் பக்தர்களுக்கு உளவியல் ரீதியான அச்சுறுத்தல் என்பதும் நான் கண் கூடாக கண்ட உண்மை.

விளையாடும் அனைவரும் வாலிப பருவும். கடவுள் நம்பிக்கை உள்ள கூட்டமாக தெரியவில்லை. கண்டிப்பாக இந்த கூட்டத்தில் யாரோ இரண்டு பேர் , இந்த செயலை செய்ய அடுத்தவர்களை ஊக்குவித்து கொண்டு உள்ளனர்.

இந்து அறநிலையத்துறை , கோவில் காவலாளி எல்லாம் இருந்தும் எல்லாம் ஊமையாக உள்ளனர். உள்ளூர் ஆட்களை பகைத்து கொண்டால் , ஊரில் இருக்க முடியாது என்று பயபடுகின்றனர்.
இதனாலே பெண்கள் வெளி பிரகாரத்தை சுற்றி வருவதை தவிர்த்து விடுகின்றனர் என்று புரிகிறது.

சிறுவர்களிடம் விசாரித்தால், சில சமயம் மதியம் கோவில் நடை அடைகபட்டாலும், கோவில் மதில் மேல் ஏறி குதித்து உள்ளே சென்று விளையாடுவார்கள் என்று சொன்னார்கள், எப்படி உள்ளே போவர்கள் என்று எனக்கு ஒரு சிறுவன் செய்தே காட்டினான். கோவில் நடை சாத்திய பிறகு, கோவிலுக்குள் போவது, விதி மீறல் ஆகாதா ?

கோவில் பாதுகாப்பு இல்லாமல் இருக்கிறது என்று புரிகிறது. நான் தினமலருக்கு தொடர்பு கொள்ள முயற்சி செய்து கொண்டு இருக்கின்றேன். அந்த ஊரை சேர்ந்த நண்பர்கள் யாராவது இருந்தால், அந்த ஊர் பெரியவர்களிடம் அல்லது அதிகாரத்தில் உள்ளவர்களிடம் , நமது கவலையை தெரிவித்து, அந்த இளைஞர்களை, கோவில் வெளியே வேறு இடம் தேடி கொள்ள முயற்சி செய்ய வேண்டும்.

இன்று இதை அனுமதித்தால், நாளை , கிரிக்கெட் என்று ஒரு கும்பல் உள்ளே புகும். ஏற்கனவே கோவில் நிலங்கள் ஆக்கிரமிக்க பட்டு விட்டன. மிச்சம் இருப்பது கோவில்கள் மட்டும் தான், அதையும் விளையாட்டு என்ற போர்வையில் மெல்ல ஆக்கிரமிக்கும் முயற்சியை , முளையிலே நாம் கிள்ளி ஏறிய வேண்டும்.